宾福特打爆富咸
今晚喺温布莱球场上演英冠附加赛决赛，爆发西伦敦打吡，由「蜜蜂仔」宾福特硬撼富咸，争取搭上价值1.7亿镑（约17.15亿港元）「冲超」尾班车。查实两军旗鼓相当，不过宾福特从未升上英超，反而更有飢渴感，射手奥尼屈坚斯脚风奇顺，何况近年交手食住富咸，为名为利实搏尽，主胜有买趁早。
宾福特虽然喺联赛最尾两轮输晒，痛失亚军及直接升班资格，但佢哋之前7场联赛赢晒，係复赛后其中一支状态最好球队，而且去到英冠附4强首回合先输0比1嘅劣势下，次回合成功收复失地，以3比1击败另一支具英超经验嘅「天鹅」史云斯，两回合计反胜3比2晋级，证明宾福特打逆境波一样咁掂。连同英冠附射入扳平球在内，宾福特前锋奥尼屈坚斯今季联赛已有26球进帐，配合宾华马及麦比奥莫，呢支英冠火力最强球队，边队对佢哋都惊惊。
富咸米祖域顶硬上未必好
另一边厢，富咸喺英冠附4强首回合领先2球下，最终两回合计险胜卡迪夫城3比2，表现明显跌Watt。而且今季联赛入咗26球嘅射手阿历山大米祖域因伤患关係，附加赛4强两回合都冇份披甲，虽然消息指佢今场可以复出，但状态未必托弗。睇番阿历山大米祖域係富咸阵中唯一入球达双位数嘅球员，过于靠佢数胡，一旦被箝制即令火力大减。儘管富咸两年前都係藉附加赛决赛赢波冲超，不过睇番双方近4次碰头，「蜜蜂仔」取得3胜1和未输过，包括今季联赛双杀对手，摆明格食格，为球队历史性首度杀上英超、争取1.7亿镑收入必定搏甩髀，主胜值得捧场。
