祖记主胜拉唔住
祖记天王Ｃ朗
金靴对决信C朗决心
今晚意甲爆激战，1哥祖云达斯主场硬撼拉素。今仗亦係两大射手正面交锋，祖记王牌C朗脚风坚顺，相反拉素箭头恩莫比尼近期立晒油，高下立见，C朗为争金靴唔会留力，加上祖记主场出击食住拉素，强捧主胜。
查实两军近况唔多掂频频失分，祖记近3仗不胜，拉素仲衰，近4仗只得1和3负，由第2位跌到落第4。不过单睇射手表现两队就有天壤之别，C朗复赛后7仗入7粒，只得1仗食白果，更重要係佢有争标决心，反而喺射手榜以29球领先嘅拉素箭头恩莫比尼，连续3仗冇波入，C朗追到只差1粒，佢为首捧意甲金靴，馀下几仗必定尽力数胡。
沙利保饭碗唔衰得
虽然祖记近期发波瘟，但多得拉素同国米唔争气，令佢哋喺榜首仲有优势，不过始终冠军未到手，为免夜长梦多，祖记自然想尽快赢波止跌，有传若然输畀拉素，主帅沙利就会饭碗不保，改由即将回巢接掌U23嘅名宿派路，直接接管一队，沙利为保饭碗自然唔衰得。祖记近6次主场对拉素赢5次，摆明格食格，何况今季两度碰头都输畀拉素，今晚复仇战冇面畀，主胜有买趁早。
