迪姆华拿横冲直撞
德甲今晚继续开快车，两支强横火力球队交锋，RB莱比锡主场迎战哈化柏林。莱比锡射手迪姆华拿上场大演帽子戏法，状态弗到震；哈化「新帅效应」照耀下，表现亦脱胎换骨，两连胜劲轰7球，加上双方碰头例演入球骚，近6次对赛有5次总入球达4球或以上，中位数3.5球嘅大盘值博！
「德甲狂牛」RB莱比锡喺德甲重开后首场，虽然仅逼和弗赖堡1比1，令人失望，但经过「热身」后，一众主力逐渐上力，上场作客大炒缅恩斯5比0，大红人迪姆华拿怒轰3球，亦係佢今季第3次上演帽子戏法，将累积入球增加至24球，继续力追拜仁神锋罗拔利云杜夫斯基。
仲有一点值得留意，就係迪姆华拿堪称哈化柏林嘅剋星，佢近4次斗哈化有5球进帐，今场随时又有「士哥」。事实上，RB莱比锡正为力争联赛前4位，夺取下届欧联入场券而努力，绝对1分都不能少。以RB莱比锡近4次对哈化，取得全胜兼轰入18球嘅走势，预料今场会继续狂攻对手。
新帅效应哈化乘勇斗攻
另一边厢，哈化柏林4月初宣布聘请拉巴迪亚执教，呢位前禾夫斯堡主帅的确有料到，迅速令球队翻生，先喺德甲重开首场以3比0大胜贺芬咸，上场「打吡战」再豪派柏林联4隻光蛋，阵中两位前锋伊比斯域及马菲奥斯根夏连续两场都有波入，力足撕破RB莱比锡防线。喺「新帅效应」下，哈化柏林球员状态及信心无疑处于高位，势必乘胜追击，作客照同RB莱比锡斗攻，球迷坐定定等睇入球骚。
