华拉度列回勇上盘派蝠利
今晚西甲压轴尾场有下游抢分战，华拉度列主场硬撼「蝙蝠兵团」华伦西亚。华伦暂时唔炒主帅查维加西亚，但佢哋连续8场联赛不胜，加上财困唔慌买到人，球队问题多多。相反华拉度列近况回勇，小让平半不妨捧上盘。
近几季华伦西亚嘅新闻，都离唔开内讧或财困，虽然佢哋日前喺西班牙盃大胜耶克拉诺4比1，但对手太弱赛果不足为据，计埋上轮赛和卡迪斯1比1后，「蝙蝠兵团」近8仗联赛只得5和3负未赢过，主帅查维加西亚甚至被传会炒鱿，最终冇炒可能都係钱作怪，费事要赔钱。
华伦财困冇钱增兵
事实上，华伦财困情况未见改善，班主林荣福已落柯打，除咗工资外都唔会再「开水喉」，如果要买人就要先卖人，因此早前话想借热刺中场哈利云克斯，都係只闻楼梯响，依家冇晒声气，查维加西亚只能尽做。
华拉度列最出名嘅，就梗係出任班主嘅「大哨」朗拿度喇，佢入主后连续两季都护级成功，坚好脚头，主帅沙治奥干沙利斯亦係「超级拉科」时期嘅一代重臣。虽然华拉度列开咧一度8场联赛不胜，好彩前线嘅舒安韦斯文及马高斯安达近期开始发威，协助球队近9场联赛，取得4胜3和2负，狂抢15分，佢哋依家只领先华伦2分，梗係想食住个势，喺呢场「护级6分波」击退劲敌，上盘值得捧场。
