莱比锡铁壁细鍊多蒙特
德甲前列大战，RB莱比锡主场恶斗多蒙特。RB莱比锡今季改以铜牆铁壁打拚，14场联赛只失9球，近4场德甲全部零封对手，「蜜蜂兵团」多蒙特虽然擅长进攻，但艾宁夏兰特受伤后未入过波，作客RB莱比锡又例少交收，今场捧2.5球入球细。
未计周六凌晨赛果，RB莱比锡只落后拜仁慕尼黑2分排次席，虽然入波唔多，但论防守稳健程度比拜仁更好。莱比锡上周联赛作客以1比0击败史特加，连同歇冬前3仗，已经连续4场保持不失，今季14战只失9球，係德甲防守力最佳球队，如果单计主场仲厉害，7战只失3球。
莱比锡后防几名战将表现出色，其中法国新星乌柏美卡奴更获得利物浦领队高普青睐，此子今季德甲平均封阻全队最多，场均解围亦只落后同胞伊巴希马干拿迪排第2。喺迪姆华拿转投车路士后，RB莱比锡踢法改为高度压迫及全场走动，左翼衞安祖利奴转守为攻能力，亦係教练拿高斯文嘅一大杀着。
夏兰特伤愈后未开斋
多蒙特今季略为令人失望，不敌下游球队科隆及史特加係过往少见，前锋艾宁夏兰特伤愈复出后未重拾射门鞋，加上过往联赛作客莱比锡入球唔多，近4次全开2球或以下，今场宁捧入球细。
