维拉鍊车大有作为
作客打反击战得心应手
今晚英超继续快车赛程，车路士主场迎战阿士东维拉。车仔啱啱喺「伦敦打吡」不敌阿仙奴，赛后一众球员被主帅林柏特疯狂「照肺」，今仗梗係想赢番场，但维拉今季作客战绩坚劲，车仔主攻啱晒佢哋打反击，双方近年碰头例演大骚，2.5球嘅大盘咪错过。
车仔近况飘忽，近4场联赛3度输波，尤其上轮作客颓爆嘅阿仙奴，竟然爆冷输1比3，成班波梦游咁款，赛后林柏特怒插球员，话佢哋完全係衰懒惰，冇用跑动去支援队友，更形容上半场表现係「灾难」，球员需要负全责。咁样照肺法班球员梗係要醒醒定定，同时「林伯」亦会作出调动，上仗冇得落场嘅基奥特，预计会代替近期唔识入波嘅迪姆华拿，「银河唯一」近5次披甲入6粒，效率惊人，拍住近两场省入3粒嘅谭美阿巴谦，车仔火力仍然值得信赖。
安华艾加斯脚风顺
另一边厢，维拉上仗喺中坚泰朗明斯被逐下，主场仍然大炒水晶宫3比0，近4仗联赛取得3胜1和不败佳绩，荷兰翼锋安华艾加斯喺呢4仗轰入3粒，脚风奇顺，当然队长基亚利殊仍然係进攻核心，今季联赛已交出6次助攻，弗到漏油。维拉今季客场成绩优异，联赛连盃赛在内8场作客获7胜1负，共入18粒，更胜一班传统劲旅，原因係佢哋突击快狠准，作客面对主攻对手啱晒口味，今仗实照办煮碗，加上两军近3次交手，全开3球或以上，2.5球大盘梗係要捧场。
