巴塞作客又捱细界
华拉度列有态要严防
西甲今个礼拜开快车，周三凌晨就有华拉度列主场迎战巴塞隆拿。巴塞今季战绩一般，作客成绩更係惨不忍睹，今场到访华拉度列难言稳胜，计埋近3次华拉度列主场斗巴塞全开2球或以下，拣2.5球嘅入球细最明智。
巴塞隆拿现时正处于管理层交接期，嚟紧1月底将选出新会长，加上球队仍受财困影响，谣言满天飞，有指王牌美斯要接受减薪协议，更有传闻有意出售菲腊比古天奴以减轻财政负担，上述传闻对球队士气肯定造成影响。
队内气氛麻麻，令呢支「地上最强」严重失色。上场联赛巴塞主场出击只能以2比2赛和实力一般嘅华伦西亚，其中一个入球更来自问题12码，攻势欠锐。睇埋佢哋作客成绩，绝对係水准以下，今季5场作客赛事，除咗首场作客赢切尔达3比0，近4仗联赛仅录1和3负，曳到令人无法接受。
巴夫韦迪虚火已过
同时，今季「球王」美斯虽交出正常水准，惟另一贵价兵基沙文长期缺态，至于巴夫韦迪喺11月底爆完一段之后，随住战事太频密明显攰爆，近4场联赛踢正选都係食白果，连「光头佬」都谢埋，巴塞作客要翻身难度更高。
华拉度列近期表现唔算太差，近6战仅1败，前锋舒安韦斯文、奥利兰拿都有入球进帐，对巴塞后防有牵制作用，令巴塞唔敢全军压上抢攻，而且巴塞近4次联赛作客除咗未能赢波，当中有3场开2球或以下，结合该队近3次作客华拉度列都少入球嘅往绩，今仗2.5球嘅入球细值得一试。
