神锋对决拖肥圣人做大骚
今晚英超头场「圣人」修咸顿主场硬撼1哥爱华顿。今仗唔单止有两军「三狮」射手丹尼艾格斯同卡维特利云正面交锋，「拖肥」灵魂人物「J神」占士洛迪古斯亦啱啱好番赶得切上阵，势必火力全开，捧2.5球大盘最上算。
修咸顿近4场联赛取得2胜1和1负，总算回稳，包括上轮作客逼和车路士3比3，韧力十足，英格兰国脚丹尼艾格斯喺呢4场入4球，呢位上季英超「银靴」保持射手触觉，可望继续数胡。爱华顿开季顺风顺水，全靠箭头卡维特利云疯狂入波，佢踢5场联赛已有7球进帐，仲劲过艾格斯，两人都要争取表现，保住喺「三狮兵团」嘅地位。
「J神」伤愈可望披甲
虽然爱华顿另一前锋李察利臣上仗打吡领红被逐要坐波监，嗰场受伤嘅「J神」一度被指继续倦勤，好彩主帅安察洛堤寻日派定心丸，指佢已经好番可望披甲，多番呢位灵魂人物，「拖肥」继续踢进攻足球，加上佢哋近7场全开3球或以上，捧2.5球嘅入球大仲稳阵。
