西甲周中快车压轴之战，卡迪斯主场对巴塞隆拿，表面上双方实力有明显距离，但系巴塞隆拿受「大伤锋」问题困扰，多位锋线球员养伤，要入波并唔容易。卡迪斯自知无力同对手硬碰，预料今场会屯重兵防守，博取1分，可热捧中位数3.5球嘅入球细。
巴塞隆拿今季因为财困，被逼放弃两位星级射手美斯、基沙文，屋漏偏逢连夜雨，新加盟嘅阿根廷前锋阿古路开季前已经受伤长抖，另外3位进攻球员安素法迪、奥士文尼迪比利、巴夫韦迪养伤，单靠迪比攻坚，无疑系独力难支。
改用高波效果成疑
上场巴塞喺西甲对CF格兰纳达，教练朗奴高文被逼用18岁小将迪美亚担任正选右翼，最后更加要踢到90分钟，先至靠中坚朗奴阿拿奥祖入波，以1比1逼和CF格兰纳达，可见「伤锋」问题有几咁攞命。
因此，赛前朗奴高文「吹风」，话打算用多啲高波，交畀新签嘅高大前锋卢克迪庄顶头槌。然而，呢招对传统以地波推进嘅巴塞嚟讲系格格不入，一时三刻恐怕发挥唔到威力，随时令进攻更加老鼠拉龟。
至于卡迪斯上场击败切尔达，终于打开今季联赛胜利之门，有助提升士气，面对陷入低潮嘅巴塞隆拿，未必会太输蚀。事实上，卡迪斯科以话系一支「神奇球队」，佢哋上季联赛两斗巴塞，竟然取得1胜1和，证明教练艾华路戴亚斯对于防范巴塞攻势，有一定心得，更何况巴塞现时人脚不整，卡迪斯好大机会以稳守踢法抢到分。
